Wie is Madri?

IMG_9343Van my vroegste herinneringe draai om stories en boeke. Daar was altyd boeke in ons huis en my kamer. Ek het “gelees” voordat ek behoorlik kon lees. Stories het sterk emosies in my wakker gemaak, my nuut en anders na die wêreld laat kyk. In Matriek behandel ons Joernaal van Jorik en vir die eerste keer verstaan ek g’n snars van ʼn storie nie. Gelukkig het ek ʼn Afrikaanse onderwyser gehad wat my liefde vir lees en skryf raakgesien en vertroetel het. Hy dra vir my ekstra leeswerk en notas aan, beantwoord my vrae en lei my om die teks te ontsluit. Ek onthou dit steeds, daardie oomblik wat alles skielik in plek geval en ek die wonder van die storie raakgesien het. Al die corny clichés is waar vir daardie oomblik; daar het ʼn lig in my aangaan, ek sweer ek kon engele hoor sing. Daarna was my keuse om letterkunde te studeer vanselfsprekend.

Na my studies (BA, BA Hons. en MA in Afrikaans en Nederlands, cum laude) het ek wonderlike, uiteenlopende werk gedoen. Ek het Afrikaanse tutoriale vir studente gegee; grimering en parfuum in Harrods, Londen, verkoop; meisies opgelei om in die groot afdelingswinkels vir skoonheidshuise te werk; ek het eksamenvraestelle vir ʼn kollege voorberei; huise vir die grootste garnisoen in Europa allokeer; ek was kortkursuskoördineerder vir Rosebank College; en ek het Afrikaans Tweede Taal vir 6 graad 12 leerlinge aangebied. In 2004 het ek as vryskutvertaler en taalversorger gewerk, is aangestel as webmeester van LitNet se brieweblad, SêNet, en koördineer ook die LitNet/Sanlam skryfskole. Tussendeur skryf ek resensies en artikels. In 2007 aanvaar ek die pos as Junior Redakteur Populêre Fiksie by NB Uitgewers en word later tot Redakteur bevorder. Tans werk ek as vryskut manuskripontwikkelaar, bied skryfkursusse aan, doen af en toe redigering. Ek koördineer ook die Woordfees se Skrywersfees.

Hier is ʼn paar dinge wat ek geleer het:

  • Om boeke te skryf en te publiseer is nie romanties nie; dit is harde werk wat deursettingsvermoë verg.
  • Wanneer jy entoesiasties is oor wat jy doen, doen jy dit goed en geniet jy dit.
  • Skrywers is mense met vrese en twyfels – selfs wanneer hulle pryse wen en topverkopers skryf.
  • Die verhouding tussen mense is belangriker as enige produk.
  • Om ʼn manuskrip te voltooi en dit voor te lê aan ʼn uitgewer verg moed en verdien respek, ongeag die kwaliteit van die werk.
  • Jong skrywers maak almal dieselfte tipe foute.
  • Wanneer jy self skryf, kan jy nie ook jou eie werk redigeer of proeflees nie. Jy het ʼn objektiewe en kundige persoon nodig om swakplekke uit te wys en jou te help verbeter aan jou storie.
  • Dikwels is nie genoeg nie; skrywers moet hulle kuns oefen en verfyn. Onervare skrywers weet dikwels nie wat die belangrikste elemente van ʼn suksesvolle verhaal is nie.
  • Ek het ʼn natuurlik aanvoeling vir stories en ʼn talent vir ontwikkeling.
  • Ek hou daarvan om onervare skrywers te help en deel te wees van hulle groeiproses.
  • Omdat ek self skryf het ek begrip en simpatie met ander skrywers se vrese en struwelinge.

Daar is vir my steeds niks so bevredigend en magies soos wanneer ʼn storie vir jou oopval en jóúne raak nie.